குறைபட்ட தகவல்கள்
உண்மையற்ற தகவல்கள் தான் நம்மை பாதிக்கின்றன என்று நாம் பெரும்பாலும் நம்புகிறோம். ஆனால் அதைவிட அதிகமாக நம்மைப் பாதிப்பது குறைப்பட்ட தகவல்களே (Information Asymmetry). இதன் காரணமாக நாம் பல தவறான முடிவுகளை எடுக்கும் நிலைக்கு தள்ளப்படுகிறோம்.
சென்ற அத்தியாயத்தில் பார்த்த சிக்னலிங் விளையாட்டுகளுக்கும் இதற்கும் நெருங்கிய தொடர்பு உண்டு. ஆனால் இங்கே நாம் பார்க்கப்போவது, தகவல் சமச்சீரின்மை எப்படி பல்வேறு சூழல்களில் பிரச்சனைகளை உருவாக்குகிறது; அவற்றைத் தீர்க்க என்ன வழிகள் இருக்கின்றன என்பதைப் பற்றி.
அதன் மூன்று வகையாக சிக்கல்களைப்பற்றி பார்க்க இருக்கிறோம்
- தவறான தேர்வு (Adverse Selection)
- பொறுப்பில்லாத நடத்தை (Moral Hazard)
- முதலாளி முகவர் சிக்கல்கள் (Principal-Agent Problems)
இதற்கான சில தீர்வுகள்
- சிக்னலிங் (இதைத்தான் சென்ற மாதம் விரிவாக பார்த்தோம்)
- தகவல் வெளிக்கொணரும் உத்தி (Screening)
- ஊக்கமளித்தல் (Incentivizing)
- தானே தேர்ந்தெடுத்தல் (Self-selection)
- நம்பிக்கை கட்டமைப்பு
தவறான தேர்வு
குதிரைச் சந்தை
குதிரை விற்க நினைத்த வியாபாரி ஒருவரின் கதையை முதலில் பார்ப்போம்.
அந்த வியாபாரியிடம் இரண்டு குதிரைகள் இருந்தன. ஒன்று மிக நல்ல குதிரை. ஆரோக்கியமானது, நன்கு வேலை செய்யும். இன்னொன்று பார்வைக்கு நன்றாக இருந்தாலும், உடல்நிலை சரியில்லாதது, அடிக்கடி நோய்வாய்ப்படும். இந்த உண்மை வியாபாரிக்கு மட்டும்தான் தெரியும், வேறு யாருக்கும் தெரியாது.
சந்தைக்கு குதிரை வாங்க வந்தவர்கள் அந்த இரண்டு குதிரைகளையும் பார்த்தார்கள். அவர்களுக்கு எது நல்ல குதிரை, எது சரியில்லாத குதிரை என்று தெரியவில்லை. எனவே, அவர்கள் இரண்டு குதிரைகளுக்கும் ஒரே விலையைத்தான் கொடுக்க முன்வந்தார்கள் – சராசரி விலை.
ஆனால் இது வியாபாரிக்குப் பிரச்சனையாக மாறியது. நல்ல குதிரைக்கு அதன் உண்மையான மதிப்பைவிடக் குறைவான விலையே கிடைத்தது. மோசமான குதிரைக்கோ அதன் மதிப்பைவிட அதிக விலை கிடைத்தது.
முடிவில் என்ன ஆனது? வியாபாரி தனது நல்ல குதிரையை விற்க மறுத்தார். அவர் மோசமான குதிரையை மட்டுமே விற்றார்.
இதன் தொடர் விளைவாக சந்தையில் இப்போது நல்ல குதிரைகள் இல்லாமல் போயின. எல்லா வியாபாரிகளும் மோசமான குதிரைகளை மட்டுமே விற்கத் தொடங்கினர்.
இதைத்தான் “தவறான தேர்வு” (Adverse Selection) என்கிறோம். தகவல் சமச்சீரின்மை காரணமாக, சந்தையில் தரமான பொருட்கள் மறைந்து, தரம் குறைந்த பொருட்கள் மட்டுமே நிறைந்துவிடும் நிலை.
அமெரிக்க பொருளாதார நிபுணர் ஜார்ஜ் அகர்லாஃப் இதைப் பற்றி “The Market for Lemons” என்ற புகழ்பெற்ற ஆய்வில் விளக்கினார். இதில் “Lemons” என்பது அமெரிக்க வழக்கில் பழுதான கார்களைக் குறிக்கும் சொல். பழைய கார் வாங்கச் செல்லும்போது, சிலருக்கு நம் எல்லோருக்கும் மனதில் இருக்கும் பயம் – “இது நல்ல காரா, அல்லது ஏமாற்றி பழுதான காரை விற்கிறார்களா?” என்பதுதான். இது பழைய கார் சந்தையை தவறான தேர்வுக்கு இட்டுச் செல்கிறது.
இந்த “தவறான தேர்வு” (Adverse Selection) பிரச்சனைக்கு பல தீர்வுகள் உள்ளன.
முதலில், சிக்னலிங் முறையை பயன்படுத்தலாம். இதில், நல்ல குதிரை விற்பனையாளர் தனது குதிரையின் தரத்தை நிரூபிக்க, உத்தரவாதங்கள் வழங்குவார். அவர் மருத்துவ பரிசோதனை அறிக்கைகளை வெளிப்படுத்தி, குதிரையின் முந்தைய சாதனைகளை காட்டி, நம்பகத்தன்மையை உருவாக்குவார். இதனால் அவரால் நல்ல குதிரைக்கு உரிய விலை வைக்க முடியும்.
தகவல் வெளிக்கொணரும் உத்தியில், வாங்குபவர்கள் தாங்களே முயற்சி எடுத்து குதிரையின் தரத்தை கண்டறிவார்கள். அவர்கள் குதிரை மருத்துவரின் உதவியுடன் பரிசோதிப்பார்கள், குதிரையை ஓட்டிப் பார்ப்பார்கள், விற்பனையாளரின் வரலாற்றை ஆராய்வார்கள்.
தானே தேர்ந்தெடுத்தல் முறையில், வித்தியாசமான விலை மற்றும் உத்தரவாத கட்டமைப்புகள் உருவாக்கப்படும். விற்பனையாளர்கள் வெவ்வேறு நிலைகளிலான உத்தரவாதங்களுடன் குதிரைகளை விற்பார்கள். சில நாட்களுக்கு திருப்பித் தரும் வாய்ப்பை வழங்குவார்கள். இதனால், நல்ல மற்றும் மோசமான குதிரைகளுக்கிடையே வேறுபாடு தெரியவரும்.
நம்பிக்கை கட்டமைப்பை உருவாக்குவதும் ஒரு தீர்வாகும். குதிரை சந்தையில் மூன்றாம் தரப்பு சான்றளிப்பு அமைப்புகள் அறிமுகப்படுத்தப்படும். விற்பனையாளர்களுக்கான மதிப்பீட்டு முறை உருவாக்கப்படும். குதிரைகளின் வரலாற்றை பொதுவில் வெளிப்படுத்தும் அமைப்பு நிறுவப்படும்.
இறுதியாக, ஊக்கத் தொகை முறையில், நல்ல குதிரை விற்பவர்களுக்கு அதிக விலை நிர்ணயம் செய்யப்படும். நேர்மையான விற்பனையாளர்களுடன் நீண்டகால வணிக உறவுகள் உருவாக்கப்படும். இந்த அனைத்து தீர்வுகளும் தகவல் சமச்சீரின்மையை குறைத்து, சந்தையில் தரமான குதிரைகளின் இருப்பை உறுதி செய்யும்.
காப்பீட்டுச் சந்தை
கீதா புதிதாக காப்பீட்டு நிறுவனத்தில் வேலைக்கு சேர்ந்திருந்தாள். அவளுடைய வேலை சுகாதாரக் காப்பீடுகளை விற்பது. தனது மேலாளரிடம் சென்று கேட்டாள்: “நாம் எல்லோருக்கும் ஒரே மாதிரியான காப்பீட்டுத் திட்டத்தை ஏன் வழங்குகிறோம்? ஒவ்வொருவருக்கும் வெவ்வேறு ஆரோக்கிய நிலைகள் இருக்குமே?”
மேலாளர் சிரித்தார். “நீங்கள் ஒரு முக்கியமான பிரச்சனையைக் கண்டுபிடித்துவிட்டீர்கள், கீதா. நம் வாடிக்கையாளர்களுக்கு அவர்களது உடல்நிலைப் பற்றி நமக்கு தெரிவதைவிட அதிகம் தெரியும். ஆரோக்கியமில்லாதவர்கள் அதிக காப்பீட்டுத் தொகை கொண்ட திட்டங்களை விரும்புவார்கள், ஆரோக்கியமானவர்கள் குறைந்த காப்பீட்டுத் தொகை போதும் என நினைப்பார்கள்.”
“அப்படியென்றால், ஆரோக்கியமில்லாதவர்களிடம் அதிக பிரீமியம் வாங்கலாமே?” கீதா கேட்டாள்.
“அதுதான் பிரச்சனை. நம்மால் யார் உண்மையிலேயே ஆரோக்கியமானவர்கள், யார் அல்லாதவர்கள் என்று கண்டுபிடிக்க முடியாது. அவர்கள் சொல்வதை மட்டும் நம்ப முடியாது. மருத்துவப் பரிசோதனைகள் செய்யலாம், ஆனால் அதுவும் எல்லாவற்றையும் காட்டாது. இதுவும் ஒரு தகவல் சமச்சீரின்மைப் பிரச்சனைதான்.”
இது ஒரு நிஜமான பிரச்சனை. காப்பீட்டு நிறுவனங்கள் பல இடங்களில் இதே சிக்கலை எதிர்கொள்கின்றன. அதனால்தான் பல காப்பீட்டு நிறுவனங்கள் “காத்திருப்புக் காலம்” போன்ற நிபந்தனைகளை விதிக்கின்றன. காப்பீடு எடுத்த முதல் ஆறு மாதங்களுக்கு சில நோய்களுக்கு உடனடியாகக் காப்பீடு கிடைக்காது. இதன் மூலம், ஏற்கனவே நோயுற்றவர்கள் உடனடியாக காப்பீடு எடுத்து பயன்பெறுவதைத் தடுக்கின்றன.
பொறுப்பில்லாத நடத்தை
நம்முடைய பிழைகளுக்கான தண்டனை நமக்கு வராது என்ற நிலை இருந்தால் நாம் பொறுப்பாக நடந்து கொள்வோமா?
முதலீட்டாளர் பிரச்சனை
வித்யா ஒரு சிறிய தொழில் துவங்க விரும்பினார். அவருக்கு ஒரு முதலீட்டாளரின் உதவி தேவைப்பட்டது. அவர் அருண் என்ற செல்வந்தரைச் சந்தித்து தனது திட்டங்களை விளக்கினார். திட்டம் பிடித்திருந்தாலும் அருண் முதலீடு செய்ய தயங்கினார்.
“நீங்கள் உழைக்கத் தயாரா? கடினமான முடிவுகள் எடுக்கத் தயாரா? இந்தத் தொழிலில் வெற்றி பெற உங்களுக்கு போதுமான அறிவு இருக்கிறதா?” என்று அருண் கேட்டார்.
வித்யாவுக்கு தன்னுடைய உழைப்பு, விடா முயற்சியில் பெரும் நம்பிக்கை. ஆனால் அருணுக்கு அது எப்படி விளங்கும்? இதுவும் ஒரு குறைபட்ட தகவல் பிரச்சனைதான்.
கடைசியில் அருண் ஒரு தீர்வைக் கண்டுபிடித்தார். “நான் உங்களுக்கு முழு தொகையையும் ஒரே நேரத்தில் தர மாட்டேன். நீங்கள் ஒவ்வொரு இலக்கையும் அடைந்த பிறகு அடுத்த தவணையைத் தருவேன். மேலும், நீங்களும் உங்கள் சொந்தப் பணத்தில் ஒரு பகுதியை முதலீடு செய்ய வேண்டும்.”
இதுதான் Moral Hazard பிரச்சனைக்கான ஒரு தீர்வு. இந்தத் தீர்வு எந்த வகைமையில் வரும் என்று யோசியுங்கள்
முதலாளி முகவர் சிக்கல்கள்
விவசாய சிக்கல்
நாம் கொடுத்த பொறுப்பை ஏற்றவர் நம் நலனைத் தன் நலனாக ஏற்பாரா இல்லையா? சக்திவேல் என்பவர் 10 ஏக்கர் நிலத்தை வைத்திருந்தார். அவரால் அந்த நிலத்தை நேரடியாகப் பார்த்துக் கொள்ள முடியவில்லை. எனவே, அவர் முத்து என்ற விவசாயியை அந்த நிலத்தில் பயிர் செய்ய அமர்த்தினார். வருமானத்தில் 70% சக்திவேலுக்கும், 30% முத்துவுக்கும் என்று ஒப்பந்தம் செய்து கொண்டனர்.
ஆனால் சக்திவேலுக்கு ஒரு கவலை இருந்தது. முத்து எவ்வளவு கடினமாக உழைக்கிறார் என்பதை அவரால் கண்காணிக்க முடியவில்லை. முத்து சோம்பேறியாக இருந்தால் என்ன செய்வது?
இது “முதலாளி-முகவர் பிரச்சனை” (Principal-Agent Problem) எனப்படும். இதில் ஒருவர் (முதலாளி) இன்னொருவரை (முகவர்) தனக்காக வேலை செய்ய அமர்த்துகிறார். ஆனால் முகவர் எவ்வளவு கடினமாக உழைக்கிறார் என்பதை முதலாளியால் முழுமையாகக் கண்காணிக்க முடிவதில்லை.
இதற்கான தீர்வு என்ன? முதலாளி முகவருக்கு சரியான ஊக்கத்தொகைகளை வழங்குவது. இதனால் முகவர் தன் சொந்த நலனுக்காக செயல்படும்போதே முதலாளியின் நலனும் காக்கப்படும்.
சக்திவேல் ஒரு யோசனை சொன்னார்: “நாம் 70-30 என்ற விகிதத்தை மாற்றி, ஒரு குறிப்பிட்ட விளைச்சலுக்கு மேல் கிடைக்கும் வருமானத்தில் உங்களுக்கு 50% தருகிறேன். அப்போது உங்களுக்கும் நன்றாக உழைக்க ஊக்கம் இருக்கும்.”
இதன் விளைவாக சரியாக உழைக்காத போது முத்துவுக்கு பெரிதாக ஒன்றும் கிடைக்காது ஆனால் நன்றாக விவசாயம் செய்தால் கைமேல் பலன்.
டீசர் ரேட்
விளம்பரங்களைப் பார்த்திருப்பீர்கள் – “முதல் மூன்று மாதங்களுக்கு மாதம் ரூ. 99 மட்டுமே!” என்று ஆரம்பிக்கும் செல்போன் திட்டங்கள், அல்லது “முதல் ஆறு மாதங்களுக்கு மாதம் 5 வெள்ளி மட்டுமே” என்று ஆரம்பிக்கும் கேபிள் டிவி திட்டங்கள்.
ஏன் இந்த “டீசர் ரேட்”? இதன் பின்னணியில் தகவல் சமச்சீரின்மை உள்ளது.
ராஜேஷ் ஒரு புதிய பிராட்பேண்ட் கம்பெனியில் மார்க்கெட்டிங் மேலாளராகப் பணிபுரிந்தார். அவர் தனது டீமிடம் விளக்கினார்: “நமக்கு இரண்டு விதமான வாடிக்கையாளர்கள் உள்ளனர். ஒரு குழுவினர் உண்மையில் இணையத்தை அதிகம் பயன்படுத்துவோர், மற்றொரு குழுவினர் குறைவாகப் பயன்படுத்துவோர். ஆனால் நம்மால் யார் எந்தக் குழுவினர் என்று தெரிந்துகொள்ள முடியாது.”
“அதனால்தான் நாம் ‘டீசர் ரேட்’ வழங்குகிறோம். குறைந்த விலையில் ஆரம்பித்து, பின்னர் விலையை உயர்த்துகிறோம். இணையத்தை அதிகம் பயன்படுத்தும் வாடிக்கையாளர்கள் இப்போதும் நம்முடன் தொடர்வார்கள், குறைவாகப் பயன்படுத்துபவர்கள் வேறு சேவைக்கு மாறிவிடுவார்கள்.”
இது “தானே தேர்ந்தெடுத்தல்” (Self-selection) என்ற நுட்பம். நிறுவனங்கள் வெவ்வேறு வாடிக்கையாளர் குழுக்களுக்கு வெவ்வேறு திட்டங்களை வழங்குகின்றன. வாடிக்கையாளர்கள் தங்களுக்கு ஏற்ற திட்டத்தைத் தாங்களே தேர்ந்தெடுக்கின்றனர். இதன் மூலம், வாடிக்கையாளர்கள் தங்களைப் பற்றிய தகவல்களை வெளிப்படுத்துகின்றனர்.
விலைக் குறைப்புகளும் வாராவாரம் ஏற்றங்களும்
ஒரு பெரிய சூப்பர் மார்க்கெட் பின்வரும் நடைமுறையைக் கொண்டிருந்தது: ஒவ்வொரு வாரமும், சில குறிப்பிட்ட பொருட்களுக்கு மட்டும் பெரிய விலைக் குறைப்புகள் – சில நேரங்களில் 50% வரை!
சந்தன் அந்த சூப்பர்மார்க்கெட்டின் விற்பனை மேலாளராக இருந்தார். ஒரு முதியவர் அவரிடம் கேட்டார்: “ஏன் எல்லாப் பொருட்களுக்கும் ஒரே நேரத்தில் விலையைக் குறைக்காமல், ஒவ்வொரு வாரமும் வெவ்வேறு பொருட்களுக்கு மட்டும் குறைக்கிறீர்கள்?”
சந்தன் புன்னகைத்தார். “இது விலை உணர்திறன் பிரித்தெடுத்தல் (price sensitivity extraction) என்ற நுட்பம். சில வாடிக்கையாளர்கள் விலை குறித்து மிகவும் உணர்திறன் கொண்டவர்கள் – அவர்கள் சலுகைகளைக் கவனித்து, அதன்படி வாங்குவார்கள்.
மற்றவர்கள் வசதியானவர்கள் – அவர்கள் எந்த விலையாக இருந்தாலும் தேவைப்படும் பொருட்களை வாங்குவார்கள்.”
“வாராவாரம் மாறும் சலுகைகள் மூலம், விலை உணர்திறன் கொண்ட வாடிக்கையாளர்கள் சலுகை உள்ளபோது அதிகம் வாங்குவார்கள். ஆனால் பணக்காரர்கள் சலுகை இல்லாமலேயே தேவையான பொருட்களை வாங்குவார்கள். இதன் மூலம், ஒவ்வொரு குழுவிலிருந்தும் அதிகபட்ச வருமானத்தைப் பெற முடிகிறது.”
இது ஒரு வகை “விலை வேறுபாடு” (Price Discrimination) நுட்பம், இது தகவல் சமச்சீரின்மையைப் பயன்படுத்துகிறது. வாடிக்கையாளர்கள் தங்கள் விலை உணர்திறனைத் தெரிவிப்பதில்லை, ஆனால் அவர்களின் வாங்கும் பழக்கங்கள் மூலம் அதைக் கண்டறிய முடிகிறது.
நம்பிக்கையும் நெட்வொர்க்கும்
நம் கிராமங்களில் இன்றும் ஒரு வழக்கம் இருக்கிறது – ஒருவரிடம் கடன் வாங்கச் சென்றால், “உன் அப்பா யார்? உன் ஊர் எது?” என்று கேட்பார்கள். ஏன்?
பழைய சந்தையில், கனகராஜ் என்ற வியாபாரி பல விவசாயிகளுடன் வணிகம் செய்து வந்தார். சில விவசாயிகளுக்கு அவர் கடன் கொடுத்தார், சிலருக்குக் கொடுக்கவில்லை.
ஒரு விவசாயி கேட்டார்: “ஏன் எங்களுக்குக் கடன் தருகிறீர்கள், மற்றவர்களுக்கு இல்லை?”
“நான் உங்கள் குடும்பத்தை அறிவேன்,” கனகராஜ் பதிலளித்தார். “உங்கள் அப்பா, தாத்தா எல்லோரும் நேர்மையானவர்கள், உழைப்பாளிகள். நீங்களும் அப்படியே இருப்பீர்கள் என நம்புகிறேன். மேலும், நம் சமூகத்தில் நீங்கள் கடனைத் திருப்பிச் செலுத்தாவிட்டால், உங்கள் நற்பெயருக்குப் பாதிப்பு ஏற்படும். அதனால் நீங்கள் கடனைத் திருப்பிச் செலுத்துவீர்கள் என எனக்கு நம்பிக்கை உள்ளது.”
இது “சமூக மூலதனம்” (Social Capital) மற்றும் “சமூக வலைப்பின்னல்” (Social Networks) அடிப்படையிலான தீர்வு. இது குறிப்பாக ஊரக இந்தியாவில் மிகவும் பிரபலமாக உள்ளது. நெருக்கமான சமூகங்களில், தகவல் பரிமாற்றம் அதிகமாக இருக்கும், மேலும் நற்பெயர் மதிப்புமிக்கதாகக் கருதப்படும். இதன் மூலம், தகவல் சமச்சீரின்மை பிரச்சனைகளை ஓரளவு சமாளிக்க முடிகிறது.
பெறக்கூடிய பாடம்
நமது அன்றாட வாழ்வில், தகவல் சமச்சீரின்மை பிரச்சனைகள் எங்கும் காணப்படுகின்றன. இவை வணிகம், சந்தை, காதல், திருமணம், வேலை, கல்வி என அனைத்துத் துறைகளிலும் தாக்கத்தை ஏற்படுத்துகின்றன.
இந்தப் பிரச்சனைகளைச் சமாளிக்க நாம் பல நுட்பங்களைப் பயன்படுத்துகிறோம்:
சிக்னலிங் – தகவல் உள்ளவர்கள் தங்கள் தகுதியை நிரூபிக்க செயல்படுவது (கல்விச் சான்றிதழ்கள், வேலை அனுபவம்)
தகவல் வெளிக்கொணரும் உத்தி – தகவல் இல்லாதவர்கள் மற்றவர்களிடம் இருந்து தகவல்களைப் பெற முயற்சிப்பது (நேர்காணல்கள், பரிசோதனைகள்)
ஊக்கமளித்தல் – ஒருவரின் சொந்த நலனே பொது நலனாக மாறும் வகையில் ஏற்பாடுகளை உருவாக்குவது (வெற்றிக்கான ஊதியம்)
ஒப்பந்த வடிவமைப்பு – வெவ்வேறு தரப்பினரின் நலன்களை ஒரே திசையில் ஈர்க்கும் வகையில் ஒப்பந்தங்களை உருவாக்குவது (பங்கு ஊதியங்கள்)
நம்பிக்கைக் கட்டமைப்பு – நீண்டகால உறவுகள், நற்பெயர் மேம்பாடு மூலம் நம்பிக்கை உருவாக்குவது
தானே தேர்ந்தெடுத்தல் – வாடிக்கையாளர்கள் தங்களுக்கு ஏற்ற திட்டங்களைத் தாங்களே தேர்ந்தெடுக்க வைப்பது
புராணங்கள், சமயங்கள், பண்டைய நூல்கள் எல்லாவற்றிலும் இந்த அடிப்படை பிரச்சனைகளையும், அவற்றிற்கான தீர்வுகளையும் பற்றிய கதைகள் உள்ளன.
உலகம் முழுவதும், பொருளாதார வளர்ச்சிக்கு தகவல் சமச்சீரின்மையைக் குறைப்பது ஒரு முக்கிய தேவை என்று அங்கீகரிக்கப்பட்டுள்ளது. அதனால்தான் வெளிப்படைத்தன்மை, சட்ட அமைப்புகள், ஒழுங்குமுறை ஆணையங்கள் போன்றவை அதிக முக்கியத்துவம் பெறுகின்றன.
தகவல் சமச்சீரின்மைகளால் ஏற்படும் சவால்களை எதிர்கொள்ள, நம்பிக்கை, வெளிப்படைத்தன்மை, நேர்மை ஆகியவற்றை வலியுறுத்தும் கலாச்சாரத்தை உருவாக்க வேண்டும். அதே நேரத்தில், நிறுவனங்கள், சட்டங்கள், ஒழுங்குமுறைகள் மூலம் அந்த நம்பிக்கையை நிலைநிறுத்தவும் வேண்டும்.
நாம் ஒருவருக்கொருவர் தெரியாதவர்களாக இருந்தாலும், நம்பிக்கையுடன் பரிவர்த்தனைகளில் ஈடுபட முடியும் என்பதே நவீன சமூகத்தின் வெற்றிக்கு அடிப்படை. ஜாதி, மதம், குலம் பாராமல் யாருடனும் வணிகம் செய்யக்கூடிய சூழல் உருவாவதற்கு, தகவல் சமச்சீரின்மையை எதிர்கொள்ளும் உத்திகள் மிகவும் அவசியம்.
விளையாட்டுக் கோட்பாட்டின் இந்த கோணமும் நமது அன்றாட வாழ்க்கையில் மிகவும் முக்கியமானது. நீங்கள் வாங்கும் ஒவ்வொரு பொருளும், எடுக்கும் ஒவ்வொரு கடனும், தேடும் ஒவ்வொரு வேலையும், கொள்ளும் ஒவ்வொரு உறவும் – எல்லாவற்றிலும் தகவல் சமச்சீரின்மை உள்ளது. அதை எப்படிச் சமாளிக்கிறோம் என்பது நமது வாழ்க்கையின் வெற்றியை நிர்ணயிக்கிறது.
கமலாதேவி அரவிந்தன்-