சமிக்ஞை விளையாட்டுகள்
நிச்சயமற்ற உலகில் தந்திரமாக தகவல் பரிமாறும் கலை. அதைத்தான் இப்போது பார்க்கப்போகிறோம். Signaling Games என்று ஆங்கிலத்தில் அழைக்கப்படும் ஜாடை மாடையாக சமிக்ஞைகள் மூலமாகத் தகவலைக் கடத்தும் நம்பகமான முறை இது. எளிதாக விளக்க குட்டி குட்டியாக சில கதைகள்.
வணிகர்களின் சவால்
முன்னொரு காலத்தில், நகரின் பரபரப்பான சந்தையில் ஒரு சுவாரசியமான நிகழ்வு நடந்தது. அங்கே வணிகர்கள் எப்படி தங்கள் மசாலாப் பொருட்கள் மிகச் சிறந்தவை என்று வாடிக்கையாளர்களை நம்ப வைப்பது என்ற சவாலை எதிர்கொண்டனர். அழகான பைகளில் இருப்பது உண்மையில் தரமான மசாலா பொருட்கள் என்பதை பிரித்துக் காட்டாமல் எப்படி நிரூபிப்பது? பிரித்துக் காட்டினால் மணமும் குணமும் குறைந்துவிடுமே!
அந்த புத்திசாலித்தனமான வணிகர்கள் ஒரு அழகான முத்திரையை கண்டுபிடித்தனர் – அவர்கள் தங்கள் பொருட்களை சிக்கலான மெழுகு முத்திரைகளால் பொத்தி வைத்தனர். இந்த முத்திரைகளை போலியாக செய்வது மிகவும் கடினம்; ஆனால் அடையாளம் காண்பதோ மிகவும் எளிதானது!
இது ஒரு “சைகை/சிக்னலிங் விளையாட்டு” எடுத்துக்காட்டுதான். சைகை விளையாட்டு என்றால் என்ன? அது எளிமையாக சொன்னால், “என்னிடம் ஒரு தகவல் இருக்கிறது, உனக்கோ தெரியாது,, நான் அதை எப்படி உனக்கு நம்பகமாக தெரிவிப்பது?” என்பதைப் பற்றியதாகும்.
வேலை வாய்ப்பு
நண்பர் வெங்கட் சமீபத்தில் ஒரு பெரிய நிறுவனத்தில் வேலைக்கு விண்ணப்பித்தார். அவர் ஒரு திறமையான பொறியாளர், ஆனால் நிறுவனத்துக்கு அது எப்படித் தெரியும்? அவர் தன் பட்டச் சான்றிதழ்களைக் காட்டினார், முந்தைய வேலைகளின் சான்றிதழ்களை சமர்ப்பித்தார், தான் செய்த திட்டங்களின் விவரங்களைக் கொடுத்தார். இவையெல்லாம் என்ன? இவை “சிக்னல்கள் / சமிக்ஞைகள்” – அவரது உண்மையான திறமைகளைக் காட்டும் அடையாளங்கள்.
இந்த உலகில் நாம் ஒவ்வொருவரும் தினமும் “சிக்னல்கள்” அனுப்பிக்கொண்டும், பெற்றுக்கொண்டும் இருக்கிறோம். நம் உடை, பேச்சு, செயல்கள், படிப்பு, வேலை – இவையெல்லாம் நம்மைப் பற்றிய தகவல்களை மற்றவர்களுக்குச் சொல்லும் “சிக்னல்கள்”தான்.
வரன் தேடல்
பக்கத்து வீட்டு பவானி, திருமணச் சந்தையில் அவளின் அனுபவத்தைச் சொன்னாள். அவளுக்கு பல திருமண வரன்கள் வந்தன. ஒரு மாமா வந்து, “என் மகன் அமெரிக்காவில் பணிபுரிகிறான், மாதம் ஒரு லட்சம் சம்பாதிக்கிறான்” என்றார். இன்னொரு வரனின் அப்பா வந்து, “என் மகன் ஐஐடியில் படித்தவன், நல்ல குடும்பம்” என்றார். இவர்கள் எல்லாம் என்ன செய்கிறார்கள்? தங்கள் மகன்களின் தரத்தை “சிக்னல்” செய்கிறார்கள்.
ஆனால் எந்த “சிக்னல்” நம்பகமானது? பவானி இதற்கான பதிலை கண்டுபிடித்தாள். “வெறும் வார்த்தைகளை விட செயல்கள் பலமானவை” என்ற பழமொழி அவளுக்கு உதவியது. அவள் ஒவ்வொரு மாப்பிள்ளை வீட்டாரிடமும் சான்றிதழ்கள், வங்கி ஸ்டேட்மென்ட், பாஸ்போர்ட் போன்ற ஆவணங்களைக் கேட்டாள். சில வீட்டார் உடனே கொடுத்தார்கள், சிலர் தயங்கினார்கள், சிலர் கோபமடைந்தார்கள்.
இங்கே ஒரு சுவாரசியமான “சிக்னலிங் விளையாட்டு” நடக்கிறது. உண்மையில் தகுதி உள்ளவர்கள் ஆவணங்களை எளிதாகக் காட்ட முடியும் – அது அவர்களுக்கு எளிய “செலவு”. ஆனால் பொய் சொல்பவர்களுக்கு ஆவணங்களை காட்டுவது என்பது பெரிய “செலவு” – ஏனெனில் அவர்கள் போலி ஆவணங்கள் தயாரிக்க வேண்டும் அல்லது தங்கள் பொய் அம்பலமாகும் என பயப்பட வேண்டும்.
இதேதான் “செலவு மிக்க சிக்னலிங்” என்ற கருத்தின் அடிப்படை – உண்மையான தரம் உள்ளவர்களுக்கு ஒரு சிக்னலை அனுப்புவது எளிது, ஆனால் தரம் இல்லாத போலியான நபர்களுக்கு அதே சிக்னலை அனுப்புவது மிகவும் கடினம் அல்லது செலவு மிக்கது.
மயிலின் தோகை
இயற்கையிலும் இந்த “சிக்னலிங் விளையாட்டு” நடைபெறுகிறது. குட்டிப்பெண் மீனா மயில்களைப் பற்றி ஒரு புத்தகம் படித்துவிட்டு ஒரு சுவாரசியமான கேள்வியைக் கேட்டாள்: “ஏன் ஆண் மயில்களுக்கு அவ்வளவு பெரிய, அழகான தோகை இருக்கிறது? அது பறக்கவே சிரமமாக இருக்குமே!”
நான் அவளுக்கு விளக்கினேன், “அதுதான் விஷயமே! அந்த பெரிய தோகை ஒரு ‘சிக்னல்’! பெண் மயில்களுக்கு அந்த ஆண் மயில் சொல்கிறது, ‘பார், இவ்வளவு பெரிய தோகையோடும் நான் உயிர் வாழ முடிகிறது, நான் எவ்வளவு ஆரோக்கியமானவன், வலிமையானவன் என்பதைப் புரிந்துகொள்’.”
உண்மையில், ஒரு மோசமான, நோயுற்ற மயில் அவ்வளவு பெரிய தோகையை வளர்க்கவோ, பராமரிக்கவோ முடியாது. அதனால், தோகை ஒரு நம்பகமான “செலவு மிக்க சிக்னல்” ஆகிறது.
ஆர்கானிக் சந்தை
ஒரு நாள் நான் சந்தையில் காய்கறி வாங்கச் சென்றேன். ஒரு கடைக்காரர் இரண்டு வகையான தக்காளிகளை விற்றார் – ஒன்று சாதாரண தக்காளி, மற்றொன்று “ஆர்கானிக்” என்ற விலையுயர்ந்த தக்காளி. எனக்கு எப்படி தெரியும் அவர் சொல்வது உண்மையா என்று? கடைக்காரர் ஒரு சான்றிதழைக் காட்டினார் – அரசாங்க ஆர்கானிக் சான்றிதழ். இது ஒரு நம்பகமான “சிக்னல்”, ஏனெனில் இதைப் பெற அவர் உண்மையிலேயே ஆர்கானிக் விவசாயம் செய்திருக்க வேண்டும், அரசு அதிகாரிகள் ஆய்வு செய்திருக்க வேண்டும். இதுவே “பசுமைத் தக்காளி” என்று வெறும் அட்டை மட்டும் வைத்திருந்தால்? அது “மலிவான சிக்னல்” – எவரும் செய்யக்கூடியது.
கல்வித் தரம்
மகனை பள்ளியில் சேர்க்கச் சென்ற தந்தையின் அனுபவம். பல தனியார் பள்ளிகள் “தரமான கல்வி” என்று விளம்பரப்படுத்தின. ஆனால் எந்த பள்ளி உண்மையில் தரமானது? சில பள்ளிகள் தங்கள் மாணவர்களின் வெற்றிக் கதைகளை அச்சிட்ட புத்தகங்களைக் காட்டின, சிலர் பெரிய பெரிய கட்டிடங்களைக் காட்டின.
ஆனால் ஒரு பள்ளி வித்தியாசமாக செயல்பட்டது. அவர்கள் என்னை வகுப்பறைகளுக்குள் நேரடியாக அழைத்துச் சென்றனர், ஆசிரியர்களுடன் பேச அனுமதித்தனர், நடப்பு மாணவர்களின் பெற்றோருடன் பேச ஏற்பாடு செய்தனர். இது ஒரு வலுவான “சிக்னல்” – ஏனெனில் தரமற்ற பள்ளி இப்படி வெளிப்படையாக இருக்க முடியாது. அவர்கள் என்ன மறைக்க இல்லை என்பதாலேயே அவர்கள் வெளிப்படையாக இருக்க முடிகிறது.
அரசியல்
நம் அரசியல் களத்திலும் “சிக்னலிங் விளையாட்டுகள்” தொடர்ந்து நடைபெறுகின்றன. தேர்தல் காலத்தில் ஒரு அரசியல்வாதி கிராமப்புறங்களுக்குச் சென்று, அங்குள்ள எளிய மக்களுடன் உணவருந்தி, உள்ளூர் வழக்கங்களைப் பின்பற்றுகிறார். இது என்ன “சிக்னல்”? “நான் உங்களைப் போலவே சாதாரணமானவன், உங்கள் பிரச்சனைகளைப் புரிந்துகொள்கிறேன்” என்று காட்டுகிறார்.
இது நம்பகமான “சிக்னல்” ஆகுமா? பொதுவாக பார்க்கும்போது, உண்மையில் மக்களை பற்றி அக்கறை கொண்ட தலைவருக்கு இப்படி கிராமப்புறங்களுக்குச் செல்வது, எளிமையான உணவு உண்பது எல்லாம் கடினமான காரியமல்ல. ஆனால் உண்மையில் மக்களை பற்றி அக்கறை இல்லாத தலைவருக்கு இது மிகவும் கடினமான காரியம். இதுதான் “செலவு மிக்க சிக்னலிங்” என்ற யோசனையின் அழகு – யார் உண்மையானவர், யார் போலியானவர் என்பதை பிரித்துக் காட்டுகிறது.
அவரின் பரிவு தேர்தல் நேரத்தில் மட்டுமே பொங்கும் என்றால் அதுவும் சிக்னலே!
ஒரு வாடிக்கையாளராக நாம் தினமும் பல “சிக்னலிங் விளையாட்டுகளை” எதிர்கொள்கிறோம். சமீபத்தில் நான் ஒரு ஆன்லைன் தளத்தில் ஒரு விலையுயர்ந்த கைகடிகாரம் வாங்க முயன்றேன். பல கடைகள் கைகடிகாரங்களை விற்றன. எந்த கடையை நம்புவது? சில கடைகள் “5 நட்சத்திர மதிப்பீடுகள்” காட்டின, சில கடைகள் “7 நாள் பணம் திரும்ப உத்தரவாதம்” அளித்தன, சில கடைகள் “2 வருட இலவச சேவை” வழங்கின.
இவை அனைத்தும் “சிக்னல்கள்” – “நாங்கள் நம்பகமானவர்கள்” என்பதைக் காட்ட முயல்கின்றன. ஆனால் எது மிகவும் நம்பகமான “சிக்னல்”? நீண்ட கால உத்தரவாதம் ஒரு வலுவான “சிக்னல்” ஏனெனில் தரமற்ற பொருளை விற்கும் கடை நீண்ட கால உத்தரவாதம் வழங்கினால், அது பெரும் நஷ்டத்தை சந்திக்க நேரிடும்.
காதலில் கவனம்
நம் உறவுகளிலும் சிக்னலிங் விளையாட்டுகள் முக்கிய பங்கு வகிக்கின்றன. ஒரு காதல் கதையை எடுத்துக்கொள்ளுங்கள். ராகவன் தனுஜாவைக் காதலிக்கிறான். அவன் தன் காதலை நிரூபிக்க என்ன செய்கிறான்? “உன்னை காதலிக்கிறேன்” என்று சொல்வது மட்டுமல்ல, அவளுக்காக நேரம் ஒதுக்குகிறான், அவளது குடும்பத்தினரை சந்திக்கிறான், அவளது நலனில் அக்கறை காட்டுகிறான். இவை அனைத்தும் “செலவு மிக்க சிக்னல்கள்” – உண்மையான காதலை நிரூபிக்கின்றன.
ஷேக்ஸ்பியரின் “ரோமியோ & ஜூலியட்” நாடகத்தில் கூட இந்த “சிக்னலிங் விளையாட்டை” பார்க்கலாம். ரோமியோ ஜூலியட்டின் பால்கனிக்கு வருகிறான். அது ஆபத்தானது – ஏனெனில் அவன் மாற்றுக் குடும்பத்தைச் சேர்ந்தவன். அவன் பிடிபட்டால் கொல்லப்படலாம். இந்த ஆபத்தை எதிர்கொள்வது ஒரு “செலவு மிக்க சிக்னல்” – அவனது காதலின் ஆழத்தை காட்டுகிறது.
இங்கே செலவு என்பது காசை குறிக்கவில்லை என்பது உங்களுக்கு தெரியும்தானே! அது போலியாக செய்யச் சிரமமானது என்பதைக் குறிக்கிறது.
எங்கும் எதிலும் சமிக்ஞை
நவீன உலகில், சமூக ஊடகங்களிலும் “சிக்னலிங் விளையாட்டுகள்” புதிய வடிவங்களில் நடக்கின்றன. டிண்டர் போன்ற டேட்டிங் ஆப்களில், மக்கள் தங்கள் சுயவிவரங்களில் என்ன காட்டுகிறார்கள்? பயணப் படங்கள், ஜிம் செல்ளீகள், படிப்பு மற்றும் வேலைத் தகவல்கள் – இவை அனைத்தும் “சிக்னல்கள்”.
தொழில்நுட்ப உலகிலும் “சிக்னலிங் விளையாட்டுகள்” உள்ளன. கிரிப்டோகரன்சி திட்டங்கள் எப்படி தங்கள் நம்பகத்தன்மையை நிரூபிக்கின்றன? ஆரம்பத்தில், நல்ல திட்டங்கள் விரிவான தொழில்நுட்ப ஆவணங்களை (white papers) வெளியிட்டன. ஆனால் மோசடி செய்பவர்களும் இதையே செய்ய ஆரம்பித்தனர். அதனால், நல்ல திட்டங்கள் புதிய “சிக்னல்களை” உருவாக்கின – தணிக்கை செய்யப்பட்ட நிரல்கள், பெரிய முதலீட்டாளர்களின் ஆதரவு போன்றவை.
வாழ்க்கையின் ஒவ்வொரு பகுதியிலும் “சிக்னலிங் விளையாட்டுகள்” நடக்கின்றன. பல நேரங்களில் நாம் “சிக்னல்கள்” அனுப்புகிறோம், சில நேரங்களில் நாம் “சிக்னல்களை” புரிந்துகொள்கிறோம். அடிப்படை விதி எளிமையானது – உண்மையான தகவலை அனுப்புபவருக்கு “சிக்னல்” செலவு குறைவாக இருக்கும், பொய்யான தகவலை அனுப்புபவருக்கு “சிக்னல்” செலவு அதிகமாக இருக்கும்.
வாழ்க்கையில் நாம் சந்திக்கும் ஒவ்வொரு புதிய நபர், ஒவ்வொரு புதிய நிறுவனம், ஒவ்வொரு புதிய தயாரிப்பு – அனைத்தும் நம்மிடம் “சிக்னல்கள்” அனுப்புகின்றன. அந்த “சிக்னல்களை” சரியாகப் புரிந்துகொள்வது நம் வாழ்க்கையின் முக்கியமான திறன். வெறும் வார்த்தைகளை விட செயல்கள் பலமானவை. பொய் சொல்வதன் விலை அதன் பயனை விட அதிகமாக இருக்கும்போதுதான், சிக்னல்கள் உண்மையாகின்றன.
அடுத்த முறை யாராவது “நம்புங்கள்” என்று சொன்னால், “நிரூபியுங்கள்” என்று கேளுங்கள். அவர்கள் அனுப்பும் “சிக்னல்” எந்த அளவு செலவுமிக்கது என்பதைப் பாருங்கள். வாழ்க்கை என்பதே ஒரு பெரிய “சிக்னலிங் விளையாட்டு” தான்!
arul@luracast.com